حسب الإتفاق

انا جاي بعد الإتفاق!
يوم ما اتفقت بيني وبين نفسي
وشهدت انا على نفسي
انا فاكر اني قلت كلام كتير
مش فاكر منه غير الحماسة
وثقتي في اني هاقدر
انا خلاص بقيت اكبر
ايه يعني تمسك إيدي!
ما انا باعرف اعدي لوحدي
…
انا فاكر الإتفاق
اني هاكون كويس
وانا هاتغير
وهاعمل وكمان هاعمل
انا فاكر كويس
اني مكملتش يوم
وقبل ما يجي وقت النوم
كنت نسيت الاتفاق
مع اني فاكره كويس
…
انا جاي ألغي الإتفاق؟
انا مش كويس
امسك ايدي وعديني
طبطب عليّ وهديني
انا طلعت عيني
لما اتفقت مع نفسي
وكأني الشاطر إللي هاعملها
هاقول كلمة وانفذها
كنت باصص عليّ
رسمتني قوي
وانا من غيرك ضعيف
كنت فاكر ان النجاح بإيدي
حتى ولو كان طفيف
…
انا جاي اعمل اتفاق جديد
انا مش فيه
انا هاسمع واصدق
وف يدّك هاتشعلق
وهامشي سكتك
بقوتك
وهابطل اصدقني
وهابطل اوعدني
أصلي دايما
بخلف الإتفاق.
….
انا جاي انفذ الإتفاق
سايب نفسي
وجايلك لوحدي
وكل منايا
تعمل جوايا
احتياج إليك
فافضل في رقبتك متشعلق
واعيش وانا عيني عليك
ماسك ف ايديك
ومصدق ان ضمان الاتفاق
هو انت
انت إللي وعدت
مش انا
وانت إللي هاتشهد
مش انا
كل إللي عليّ
اني اجيلك
وانا جايلك حسب الإتفاق
Samuel.G Basta
23:23
15 Sep 2016