عشرين يناير

“عشرين يناير ستة وتمانين”
كانت اجابتي على اسئلة السنين
عشرين يناير
مانيش عارف انت مجرد بداية
ولا علامة ماشية في اجندة العمر
مانيش فاهم مين بيجري ورا التاني؟
يا سابقني وانت ورايا
يا قاسم يناير سنيني
كل مرة باسألك
على فين هاتوديني
واللي راح .. راح فين ؟
هو ايامي عندك بتبدأ تعد م الصفر
طيب واللي اتعد .. اتهد ؟!
مين بيحفر ف التاني
انا ولا السنين ؟
طيب مين اللي عارفين ؟
هو علاقة البشر بالايام ليها قوانين ؟
مانتاش يوم واحد ف سنتي
دا انت بتكرر كل مرة فيها بقرر
اصحى من نومي اعيش يومي
انت تاريخ ميلاد كل يوم
طول ما النهار موجود
والنور دايم
آديني قايم
اعيش للي لاجله اتخلقت
مجد إللي اوجدني
وليوم ما اجدني
ف حساب زمن تاني
بتقويم سماوي
اديني ناوي
اعيش كل عشرين يناير
كل يوم
لاجل ما يدوم
حضورك في ايامي
آه لو اعرف يا يوم عشرين
فين ساكن ف بيوت السنين
كنت جبتك يوماتي
تعيش معايا حياتي
لآجل مجده
20 Jan 2016

Samuel.G Basta