مقبرة القصايد
ف آخر الصفحة حفرتها.
بصبر وإرادة
اكبر من كل إللي قبلها
تكفي كلام الغمّ والسعادة
وشاهد قبرها عامود
يكفي اسماء كل القصايد
دي مقبرة جماعية
مش لواحدة زي العوايد
…
يا مقبرة القصايد
انا جهزتك
ومن غير ردم سيبتك
فافهميني
وساعديني
اعمل جناز إحتفالي!
لجزء من كلامي
لأنفاس من روحي
لحتة مني
لكني!
ناوي أوئدها
بعد ما تتولد
وف ساعتها
مش هاخليها تعيش
ولو انتي ماتعرفنيش
انا مش قاسي
مانيش من الجاهلية
عشان اوئد بنات افكاري!
ساعديني اودعهم بكرامة
الفكرة إني بكتب بنبل
ولو سلاحي في يوم هايجرّح
هابيعه!
وبتمنه هاوزع حاجات تفرّح
ولو قصيدتين هربوا من زنادي
والعيار بان وكأنه طايش
وكأنه فلت مني!
وقالولي عادي
عبّر طول ما انت عايش
دي حروفك وسطورك
تعابيرك بتاعتك
ريحة ورد ولا بارود
الحق ليك يعود
كمل!
…
مانيش مكمل!
والمقبرة شاهد
وعلى شاهدها
هارص اسامي
حتت مني
في صورة قصايد
وهادفنهم مش حزن
هادفنهم نبل
فتموت قصايدي
وينطفي شرار السطور
وينكسر قلمي
لو في يوم هايقلب ساطور!
حقي إنه من حقي إني أمنعني
هاكتب وهادفن .. ولا يشوفوا النور
راضي وسعيد
وكأني بكتب من جديد
وكأني حي
لأ انا حي فعلا!
حيّ وحر
عشان كده
هاكتب لجوّه!
وادفن في اخر الصفحة
ف مقبرة القصايد.

24 Oct 2016

قالولي عيارك فلت
والشرار طاير م السطور
حصالتك كسرتها بعد ما إتملت
وقلمك الناعم اصبح ساطور
طايح بيضرب بحنّية
ونسبة الإصابه مية ف المية
والكلمة بفكرة
بنفكر فيها لبكره.
…
قالولي ارجع للهامش
استكين ما بين حروفك
بلاش توصف ظروفك
بلاش تبدع ف وصف حروبك
وكفاية ريحة بارود!
رجّع لصفحاتك ريحة الورود
واحكي بالراحة
من غير صراحة
مشاعرك من حقك
ومحدش عارفها قدّك
بس بتعيشّنا معاك
واحنا في مكانّا
بنكون وياك
…
افلت عيارك وصيب
اوعى طلقاتك تخيب
انطق سكوتك
وانطلق من سكونك
دي الصفحة كونك
فافلت عيارك فيه.
……

سطور للاستخدام الشخصي

سطور برائحة البارود

…..

21 Oct 2016

تلك السطور كانت..
كرصاصة تريد أن تنطلق بعناد
كعدادٍ ينتظر لمسة زناد..
خرجت ولم تعد..
لكنها عندما خرجت لم أعُد أنا إلى ما كنت عليه

21 October 2017

اتخلقنا بنحب ونتحب
بودان في جنب راسنا
عشان نسمع اللي ماشي جنبنا
اتخلقنا بنمشي لقدام وبنسمع من الجنب
ليه؟
لاجل الصحبة …
لاجل ما نصاحب
ونتعاتب
ونتحابب
ونتحادث
لاجل ما نمشي نحكي ونتسمع
دي بداية القصة … قصة صحبة …
#نوفمبر_الصحبة

3 Nov 2015

#التلقائيين

عارفين الناس دي؟

دي الناس اللي بترتاح ف التعامل معاها دي الناس اللي لما بتوصفها بتقول: مريح، بسيط … قلبه ابيض.

دي الناس يا جماعة اللي قررت تعيش بوش واحد عشان كدة بيتصرف ببساطة لانه مش مخبي حاجة جواه .. دي الناس اللي تلاقيه بيكلمك بصراحة وادب ووضوح .. دول نفس الناس اللي بتلاقي نفسك قادر تواجهم بصراحة وتسألهم بوضوح من غير ما تكون خايف منهم.

دي الناس إللي واثقة في رد فعلها الاولاني قدام اي موقف .. ببساطة لانهم مش هايتصرفوا تصرف غير إللي جواهم .. لانهم بوش واحد.

الناس دي عفوية ومع ذلك ما بتجرحش ف كلامها … الناس بتتخنق من التكليف والتصنع وتأويل الكلام.التلقائيين .. بسطاء لكن مايضحكش عليهم … طيبين بس بيعرفوا ياخدوا حقهم.ماتحوروش كلامهم .. واحترموا صدقهم … خليهم صحابكم لانهم هايساعدوكم ع التغيير بدون مجاملة.الناس دي عايشة خفيفة اصلها مش شايلة من حد.التلقائيين بركة وسطينا … لانهم نموذج للناس اللي في قلبها على لسانها … واضحة وصادقة.الناس دي مش بتخاف تواجه ردود الناس عليها.

13 April 2016

الصديق..هو الذي يرتاح عقلك في الحوار معه ويطمئن قلبك لوجوده.. والاهم هو إنك تكون قادرًا إن تكون نفسك وتتصرف على سجيتك دون أن تخشى نقد جارح منه أو نظرة دونية أو إستخفاف..ابحث عن صديق لايشبهك تمامًا ولكنه كالمرآه تقدر إن تقف دون خجل أمامه فترى نفسك..وإن حصلت كرجل على فتاة بهذه المواصفات فأعلم إنها الأصلح لتكون زوجة لك.. مع إفتراض تشابه مبادئكما وهدفا حياتكما..وإن وجدت رجلًا فيه هذا، فهو الصديق الذي يعبر المحيط من أجلك فحارب حينئذ المحيط من أجله

17 Aug 2019