بفكر في إللي هاقوله لنفسي وأنا قاعد في البيت اثناء ساعات العمل الرسمية في شغلي إللي سبته عشان طلعت معاش.. ومش عايز ازعل مني ولا ازعلني ولا اعاتبني ولا اعتبرني شاب طايش ضيع فرصة من عمره مش هاترجع.. وبحاول أسألني لما أكبر أعمل إيه دلوقتي عشان ما تجيش تضايق مني بعدين.. بحاول أفّهم نفسي وهي كبيرة إنها دلوقتي بتحاول تعمل إللي عليها واكتر وإن صراعها مع الزمن ماخلصش وما اتحسمش.. وانها بتحاول تاخد أكتر فرصة كسبانة وتختار طريق تمجد فيه إللي خالقها. بس أنا مش مطاوعني أكمل غير لما أسألني وأنا كبير: أعمل إيه يا كبير عشان صغيرك يبسطك لما تقابله في ساعة عصاري في نص الاسبوع؟

صموئيل جورج

20 /4/2020

واحد وتلاتين يوم
دول كانوا عينة عشوائية من العمر
عمر نُصه ترحال ونُصه استقرار
واسبوعين كل ليلة تحت سقف
وايام بلا سفر
وايام بلا معنى
وايام للذكرة
وايام ماعنديش عنها فكرة
وكل يوم بيختلف حتى ولو ليه نفس الشمس
كل يوم حكايته بتبدأ بكان يا مكان .. في مراحم جديدة لليوم ده
وتخلص حكايته باحسانك ما فارقنيش

وتوتة توتة قصة بكرة عندك معروفة

وانتهى مارس
ولم ينتهي الترحال فالترحال نمط الحياة 

والترحال دليل ع الحياة 

١ ابريل ٢٠١٦

أزيكم  ..

حابب أحكي حبة عن اليوم اللي نشرت فيه فيديو كلمتي في فرحنا.. ده كان بعد فرحنا بسنة بالظبط.. كان أخر توقعي قبل ما أنشره أنه يجيب 50 تعليق وبتاع 100 شير بالكتير.. لكن لما صحيت تاني يوم لقيت الموضوع كسر توقعاتي.. ودي ماكانتش المفاجأة الوحيدة .. المفاجأة الحقيقية إن اللي كان نفسنا فيه وإفتكرنا إنه حصل طلع لسة بيحصل .. كان نفسنا في فرحنا إن الله يتمجد لأنه السبب في كل حاجة مش إحنا .. إحنا عملنا الدور اللي علينا على قد ما قدرنا لكن اللي فتح عنينا وجمعنا هو الله … كل مرة فيها فيديو فرحنا بيتشاف في شخص بيسمع المجد لمن له المجد أكتر من مرة.

الفيديو إنتشر مش لأن كلماته حلوة.. لأ! هو إنتشر عشان حقيقي .. حقيقي في دموعه حقيقي في كلماته.. كل سطر فيه إتكتب من خلال عيشة أيام أو شهور.. حقيقي في إنه المجد لربنا فعلًا مش لينا.

ركزوا معايا .. أي أتنين بيتجوزا بيدورا ع الإبهار .. إزاي يبهروا الناس في فرحهم عشان الناس تطلع مبسوطة بيهم.. أنا وميرا كنا هانقع في نفس الفخ.. فخ البحث عن الإبهار.. بس الإبهار الحقيقي إنك تفتح عنين الناس إللي حاضرين على جمال معاملات الله.. فيعرفوا إن خطوط تلاقي البشر مش صدفة.

نشرت الفيديو بعد سنة جواز.. عشان في ناس كتيرة كانت متحدياني وقت الخطوبة إنه بعد أول سنة هاغير نظرتي المتفائلة عن الجواز.. وإني عامل زيهم.. زي “سعيد يرتدي الأحمر يخطط لحفلة إعدامه بفرح”، عشان كده لو كنت نشرت الفيديو قبل سنة كنت هالاقي ناس بتقولي أنت بتنشره عشان لسه في شهر العسل .. لسة ما شفتش حاجة!

في الحقيقة أنا لسه ما شفتش حاجة من إحسان الله في حياتي وحياة كل واحد بيقرر إنه يدور على مصلحة الله في كل حاجة بيعملها.. الله أكرم من توقعاتنا وأحن من نفوسنا لينا.. عارف السعادة اللي مالياك وانت بتقرا الكلام ده سببها إني أتكلمت عن جمال الله مش سببها إن الكلام حلو.. أنا ماعرفش أنت واصل في حياتك لأنهي مستوى في قاع التعاسة لكن إللي أعرفه إن رحمة الله ساعت كل الدنيا بما فيها أنت بتعاستك ومشاكلك .

الجواز مش غسالة أتوماتيك تديها غسيل ومية وصابون تديك هدوم نضيفة .. الموضوع مش وصفة.. الجواز هو إستعداد للإلتزام الشخصي في السر بينك وبين نفسك قبل العلن .. الجواز هو بيت والبيت ليه كبير والكبير ده إن ماكنش ربنا يبقى على بيتكم العوض.. وللأسف مافيش عوض هايعوض غياب الله عن حياتكم وبيتكم.

فاكر كنت في مرة بحكي مع القائد بتاعي في الكنيسة.. يومها كنت في ثانوي.. جات سيرة الجواز راح سألني بطريقة مباشرة: صمويل هو أنت لو إتجوزت هاتحب مراتك إزاي؟ .. بكل تلقائية جاوبته: كما أحب المسيح الكنيسة يعني حب فيه تضحية حتى الموت.. راح صدمني بإجابة بسيطة: يعني هاتكون مستعد تموت عشانها ومش مستعد تغير رأيك في لون التلاجة؟؟.. من يومها وأنا فاكر إن التضحية والحب مش كلام، الحب فعلٌ يا سادة في مصدره الحب فعلٌ يُسمع صوته في الموافقة على لون تلاجة عشان أنت عارف إن الألوان بتفرق مع مراتك أكتر منك وانت مش عارف الفرق بين السيموني والكموني ورايح تتخانق على اللون.

الحياة مليانة اختلافات لو ما تعالجتش وإتحطلها بروتوكول تعامل هاتتقلب لخلافات.. ده عن تجربة مش كلام مقالات قريته.. عارف صاحبك إللي بتحبه أو أنتيمتك إللي بتعشقيها .. العلاقة دي مش بنت يوم وليلة العلاقة دي أنتوا صرفتوا عليها تنازلات معقولة ومقبولة وإستعداد للتفاهم.. بقيتوا عارفين إيه اللي بيضايق أصحابكم وإزاي تبسطوهم.. الجواز كدة برضه علاقة بتتبني في أيام مع إستعداد للتفاهم والإستفهام.. أستفهام يعني تسـأل ليه ده حصل؟ إيه اللي بتحبه ؟ طيب ده لو حصل هانعمل إيه؟

الكلام إللي جاي لكل واحد بيمر في فرن الحياة متمهلًا.. لكل واحد بيتمشى في شارع الأحزان جريحًا ووحيدًا.. أنا كنت بتمشى جنبك على فكرة.. وهاتلاقي حيطة عندك كاتب عليها بدموعي حكاية سؤال.. أنا كتبت كتير عن الفرن وعن الوحدة وعن التشكيل وفي يوم كانت الفرن عالية في حرارتها والدموع ما بتتشفش عشان بتنشف من الوجع قبل ما انا أذرفها: بصيت لمَخرج الفرن عرفت إن الفرّان شاطر ومافيش حاجة بتتحرق منه.. يومها سألته من تلك التي من أجلها تجيزني هذه الفرن؟!

الله إدالك عقل وفكر وحرية وإرادة ومش هياخدهم منك عشان يريحك من مسؤلية قراراتك

خد كل حاجة في حياتك بشكر وإعمل إللي يمجد الله واعمل دورك في حياتك.. ودخل ربنا في حياتك واعرف إنه إدالك عقل وفكر وحرية وإرادة ومش هياخدهم منك عشان يريحك من مسؤلية قراراتك.. لكنه أمين في أنه يوريك اشارات وتحذيرات في الطريق لو أنت أمين في إنك تعرف رأيه.. وهايبعتلك ناس تاخد بإيدك وناس تطبطب عليك برحمة مصدرها الله.. واعرف أن الجواز حلو لو إخترت صح وأخترت تكمل صح  واعرف أن أول سنة جواز هاتشكر الله فيها على إحسانه وعلى تشكيله فيك وهاتصحى كل يوم الصبح تقول المجد لمن له المجد.

صموئيل جورج

19 فبراير 2020

23:46

#في_فرق
بين انك تخسر حياتك وبين انك تخسر نفسك.
لما بتخسر حياتيك انت بتختار بكامل إرادتك انك تموت عشان قضية او عقيدة او حب وطن او حبك لإنسان.
دي هي قمة التضحية والحب لانه ليس لأحد حب أعظم من هذا .. حب يقودك لكي تموت من أجل من تحبهم.
لكن تخسر نفسك … هي ببساطة انك تكون مش انت عشان خاطر إللي بتحبهم … تفقد ثقتك في نفسك تغير طريقة حياتك وقناعاتك تحاول انك تعيش حاجة مش موجودة ف DNA بتاعك … ده مش تغيير .. ده تدمير ذاتي بطئ … دي مش تضحية ده انتحار مكونات انسان … لو وصلت للمرحلة دي … اختار انك تنط من سفينة الخطر بدون تردد … لانه ان مت انت افضل من ان يموت شبيهك المدمر .
المنظر من برة بين فقدان حياتك او فقدان نفسك ممكن يكون شبه بعضه … لكنه مختلف ف #الجذور.
حدد موقفك او مت وانت لا تدري.
#التحذير_لا_يكون_برفق
#ابريل_الجذور

9 أبريل 2016

21 :35

:رفعت صوتي بحيث لا أحد يسمعني خارجي

فلتصمتوا قليلا … أليس من حقي أن استمتع بالموسيقى
صرخ طموحي وهو يلهث: أليس لي ان أحلم وأن أضع السماء حدودي؟!
أجابت نفسي: وأليس لنا ان نحظى بنسمات رضى داخلي … أليس لي من ايام إحتفال بما وصلنا إليه
طموحي: كيف والسباق لن ينتهي؟
نفسي: ولن ينتهي حتى وإن توقف جسدنا عن الحياة
طموحي: إذا دعينا نموت ونحن ناجحين
نفسي: إن جريك خلف النجاحات سيجعلنا نموت لاهثين
طموحي: بل سنموت والجميع يفخر بنا
نفسي: وماذا سيصنع لنا الجميع عندما نرحل عنهم؟
طموحي: سيبكونا وسيخبروا كم صنعنا وسيشهدوا بنجاحنا وسيذكرونا طويلا
نفسي: ثم ينسونا … هكذا ولا بد ان تنتهي الحكاية.
طموحي: لماذا تريدي التوقف يا نفسي
نفسي: لأن العمر لا يكفي لتحقق كل احلامك يا طموحي
طموحي: إذا فلنجعل عمرا اكثر غنى … ونحقق ما نقدر عليه
نفسي: بل لنجعله أكثر ثراء وعمقا … ونحقق ما يجب ان نحققه قبل ان نرحل
طموحي: فليكن اكثر شبعا
نفسي: بل فليكن مشبعا أكثر
طموحي: لماذا تفكري هكذا يا نفسي؟
نفسي: لماذا تفكر هكذا يا طموحي؟
…
كفى.. كفى حديثا داخليًا.. تأملوا جمال الموسيقى.. غدًا نكمل شجارنا

Samuel.G Basta

20 Aug 2016

​في ناس عايشة حياة في انتظار موت

وناس عايشة بتواجه الموت

وناس عيشتها بطعم موت 

وناس ماتت ومهياش عارفة

وناس عايشة ومهياش عارفة 

وناس ماتت في العالم مرة 

وناس ماتت عن العالم مرة 

ده الموت في العالم مرة 

وانا قد متها.

Samuel.G Basta

12 Feb 2015

19:05

​ما بين اليوم وأمس لحظة

وبين الآن وغدًا أيضًا لحظة

وبين كوني جنين وكوني طفل لحظة

بين الحياة والموت لحظة

وبين النجاة والهلاك لحظة

بين العناق والرحيل لحظة

وبين السفر والوصول لحظة

بين الضوء الأخير والظلام لحظة

إنها اللحظات التي تفصل بين الأشياء وعكسها

إنها اللحظات التي لانكون بعدها كما كنّا قبلها

إنها لحظات فارقة.. لحظات منسية في قاع الذاكرة غارقة.

تذكروها لأنها ترسم حدود ملامحنا الداخلية

إنها #اللحظات_الحدودية في خريطة أعمارنا.

Samuel.G Basta

1 Feb 2017

00:07

​يجي من سنة كدة..

سألتك سؤال: …لحد امتى؟

يومها برد سماك رد علىّ بصمت ساقع

رعش قلبي المضطرب جوايا.

وافتكرتك سمعت والسؤال معجبكش

وطلعت غلطان!

أتاريك شغّال وبتحل مشكلتي وانا معرفش

وانهاردة صمت برد سماك فكرني اشكرك

فأنا جاي شاكر جميلك وسندة إيدك

وحضنك الأبوي الدافي

إللي خلى قلبي ينتعش

صموئيل جورج فارس

25 Dec 2016

19 : 07