شاي مُر
وسنين العُمر
أديها بتمر
والسكر بيتّقلب
ف الكوباية بتفرح
ويوم بعد يوم
والصورة بتتركب
فبتوضح!
وآلاقيني باسرح
ف ذكرى!
كنت خايف ل يجي بكرة
وألاقيها فكرة
وتموت ف بحر الذاكرة
وأهي ماتت
قصة وفاتت
والحياة ارتاحت
وده كان عكس ما كنت أظن
فإطمئن
ده الشاي ما طلعش مُر.

Samuel.G Basta

26 Nov 2016

14: 09

وتقولي: إيه إللي جابك؟

انا جاي هنا أسمع صوتك

وألمس بإيديّ دفا كفوفك

انا جايلك من متاهة

تِبان فيها كل الطرق متاحة

بس النفس فيها مش مرتاحة

انا جايلك لأن بابك قريب

مهما كنت ف توهاني بعيد

ولما أبان وسط الناس غريب

أتديّر آلاقي بابك!

وكأني بَلف ف محيطك

أو بابك ماشي معايا

كل حيطة بتَخيَّلها حَيطك

بازرع الأمل جوايا

إني آلاقي فيها بابك

ولما نفسي تبعد عني

خصام او تجاهل

بالاقي طبطبة منّك

ولما تدلعني نفسي بتَساهُل

بالاقي شدة ترجع الركب إللي سابت

انا جايلك كدة

معسّكر في بيتك

عايزك … عايز احكي معاك

يا عارف بمجيئي قبل ما أوصل

حبيت أحكي معاك

فقلتلك انا جاي ليه.

Samuel. G Basta

11 Nov 2016

وكأنها زيارة سنوية

جيتلك من مدة

يجي من اتنين وخمسين سبت

طرابيزة واحدة

وتلات كراسي فاضيين

وانا معاهم

قدام النيل

غيرت تراك المزيكا

غيرت لون التيشيرت

لسة غروب شمسك جميل

نفس القهوة

نفس تلقيمة السكر

نفس ضيّ الشمس ع المية

مية نيلك زي ما هيّه

لسّاها قادمة من الجنوب

وكأن المشهد متكرر

بعد سنة

لكن ما إختلاف القلوب

قلبي كبر معاك

شفتك وشفت إيدك

وإحسانك

خلى سوادي الحالك

قلب لنور

هوايا مبقاش اسود تقيل

جوايا ما عدش في ليل

ولو غاب نورك ع النيل

لسة ضياك ف حشايا

وقبلها من سنتين

جيتلك بنفس السؤالين

لو نيلك ناسي كلامنا

انا لسة فاكر

فاكر طلبتي الصامتة

وإسترسالي ف السكوت

فاكر وقتي اللي بيفوت

واحلامي إللي بتصارع

مش عايزة تموت

عايز اجيلك كمان سنة

بوضع مختلف

عايز آجي أعترف

بصلاحك وإكرامك

يا غني على عبيدك

انا خدّامك

مستني الجود

ياللي شبعي قدامك

كمان اتنين وخمسين سبت

وهاعدي عليك

اشكرك

وافكّر النيل

بانك صالح

29 Oct 2016

 

انا هنا!

في بيتك

لأن كل طرقي الحيرانة

إتقاطعت قدام بابك

فدخلت لرحابك

لاجل ما أقابلك

زي ما أنا

وآديني هنا

…

أنا الآن!

لاني لسّة شارب حيرة

وواكل توهان

مفتاحي واحد!

وقدامي غابة م الببان

…

أنا هنا والآن!

لأني ماعرفتش أعمل حاجة

وورايا مية حاجة

وجوايا بتزيد الحاجة

لهدايتك ورعايتك

فدخلت احكي معاك

…

أنا هنا والآن وإلى حين!

لغاية ما لاقي خطواتي مرتاحين

في سكتك

وآلاقي قلبي وروحي متطمنين

بمعيتك

وأشوفني في غابة الببان

مش محتار

معايا مفتاحي

وبابي واضح زي النهار

وإلى ذاك الحين

انا وورقتي الزرقا مقيمين

هنا والآن.

28 Oct 2016

عديت عليك
جيت لحد بيتك
مش جاي زيارة
ولا طالب حاجة وهامشي
جاي اقعد عندك
وهبات!
مش عارف كام ليلة
ومش قادر احدد كام يوم
بس انا هافضل من غير نوم
انا عايز احكي معاك
ولو نعست
هايفضل قلبي يناديك
انا جايبلك #الورقة_الزرقا
وجايب نفسي بعبلها
بهمومها وخوفها
وتوهانها وجروحها
انت عارف اني مش عارف
ومش هاعرف اعمل ايه
فماليش غير بيتك
عشان اتطمن
اصلك انت إللي بتضمن
سلامة المسير.
وشكل المصير.
انا جاي بايت صباحي
ف بيتك
وهاعلق ورقتي على حيطك
انت عارف اني بحبك
وبحب بيتك

Samuel. G Basta

12 Oct 2016

​في سكة طلوع الحياة

أطلع مطالع مش عارف منزلها

واصعد لقمة ماداريش بقاعدتها

ف سكة عكس اتجاه الجاذبية

عضلات تعافر 

والسؤال ف الذهن حاضر 

على فين؟

وكل خطوة تدب في الرملة

بتسألني من غير تنطق كلمة:

وبعدين؟..

وبعد كل منحنى

افرد عودي إللي اتنى 

واتأمل مطالع شبه بعضيها

والنفس محتارة ومش بإيديها 

تختار مطلع سكتها اللي جاية

وتطول وقفتي  

وافتكر تفاصيل سكتي.. 

إللي انتهت بيّ هنا 

فاصمت مبتسم 

أصل إللي إبتدا معايا

قادر يكمل بيّ لآخر رحلتي

وده مجرد مطلع 

في قصة..

ملامح إحسانك فيها

وفي كل خطوة السندة بتطلع

يا قدير..

خطواتي إللي جاية

في مطلع جديد

يا من لا يوجد امامه جديد

انا هنا والآن

ع المطلع

………..

Samuel.G Basta

15 April 2017

15:05

Tahta

Pic. Owned by me

El khalas vally – Wadi el Natroot. Egypt

​ادخل دارك وامكث في حضرتك 

وانسى باب الخروج 

وافقد الإحساس بالزمن 

ويصبح العمر لحظة طويلة 

اسعى لأعيشها في ضي هيبتك

..

 ادخل دارك لأمكث امام العرش 

حيث البهجة تقفز من الفرح 

والقلب ينبض في مرح

والعيون تبكي سعادة 

والفم بفغر اندهاشا

فرؤياك تجعل التعبير يهرب 

ولا املك إلا الصمت ابتهاجا 

….

ادخل دارك لأمكث متمعنا في رؤياك

ارى صلاحك وإحسانك

ارى جودك الذي ذخرته لخائفيك 

اعيش مخافتك 

فينطبع علي من هيبتك 

…..

 إني أشتاق للمكوث في دارك 

فدعني امكث وأنسى مكان باب الخروج

#فبراير_المكوث

5 Feb 2015

12:41

​أنا بتاع كل سنة

إللي بيجيلك في نفس اليوم

نفس السحنة مع إختلاف لون الهدوم

انا بتاع الوعود

بوعدك وأوعد نفسي

هاكون احسن وهاعمل كويس

وكأني أصدق واحد ف الوجود

وكأن حياتي مركب وانا الريّس

وانا إللي بقوللك إللي فات مات

واللي جاي مليان حكايات

عن بني آدم غيري

ناوي أعيشه

..

أكيد فاكرني

أنا بتاع السنين إللي فاتت

بتاع يوم واحد

انا بآجي أساسًا

يوم واحد

وباقي الأيام بفلسع

انا كنت هنا

من بالظبط سنة

كانت جايلك وناوي اعمل

كنت وقتها بقولّك ع النيّة

وشرحتلك امنيات مستخبية

ومشيت عشان اعملها

وراجعلك من غيرها

..

وأنا جاي تاني

بس مش زي كل سنة

انا جاي طالب خطتك

رسمتك

نرسم بكرة سوا

يوم هناك

ويوم هنا

بس كله لمجدك

انا جاي مش ناوي

غير اتشعلق فيك

وبقوتك

هاعمل اكتر من كل سنة

انا المرة دي مش بتاع كل سنة

انا جايلك متّعلم انه مش ب (أنا)

لكن بيك.

انا هنا

ف بيتك

اول السنة

انا بتاع كل سنة

بس مش أنا.

Samuel.G Basta

1/1/2017

14: 48

​احترت ف اسمك 

وهاشتاج رسمك

اسميك ايه يا اول الشهور

ياللي بتفكرني بعمري اللي بيدور 

مانيش عارف في نصك ايه 

ولا قادر اشوف اللي مداريه

كل اللي عارفه عنك 

يوم ميلادي في اخر تلتك

حاسس اني فيك هاتشكل 

يمكن اتفرمت يمكن هاتعدل

متاكد اني مش هاتبهدل 

اصل الاحسان مش بيتعطل 

ولا في يوم الحماية بتتبدل

…

مسلمك من اولك لرب الزمن 

وف اخرك لو وصلت هافكرك 

بان همّي اندفن

 ولو كانت فيك اشد المحن

فكرني بان الرجالة بتطلع 

من العيال لما تتطحن

….

 

يا يناير 

ارسي على برّك

سيبك من قلبي 

ومن فكر عقلي 

ومن اللي جوة داير 

شايل ايه ف كفك ؟

اسمك ايه يا يناير؟

Samuel.G Basta

1 Jan 2016

23: 52