وعليه..
ليس لفضلٍ فيّ
أو دَينًا رُد إليّ
فأنا العاجز
الذي عَبَر الحاجز
ولم يصدق!
وعندما أدركت عبوري
أيقنت إنه لم يكن بمقدوري
أن أكون هناك إلا بنعمته
ولن أمضي قُدمًا إلا بمعيّته..
وعليه..
فهتاف ما بعد الحاجز
هو سطر جديد في
سطور في الحياة

21 October 2018

وارجع من الفرن!
بعد ما اجيب منه ضحكتي
وابتهج لما اراجع سكتي
واعرف ان احسانك
كان رفيق وحدتي
يا صاحب الإحسان
ياللي واهب فرحتي
أديني مبتهج بيك 😊😊

14 Oct 2016

شربت حاجات سخنة كتير … ووسط الاف الكوبايات والمجّات في كام واحد مش قادر انساهم.
كوباية شاي ف نص الليل مع غفر … اصروا اني اشرب قبلهم لان الكوبايات مش هاتكفي لينا كلنا.
فنجان القهوة اللي طلبته بنرفزة من ماما ليلة امتحان انجليزي تالتة ثانوي … عملتهولي. بحب وسهرت معايا لاني كنت مضغوط.
كوباية مية جابهالي طفل وايده بتتهز وماشي بالراحة .. بس الحب اللي ف عنيه رواني قبل ما اشرب.
حطوا في مشاريبكم حب … ما تقدموهاش مسكرة بس.
حطوا برطمان حب ورحمة في مطابخكم.
مشاريبنا مش سكر بس.
#نسكافيه_صنع_بحب

13 Oct 2016

واكتشف اني تهت
واعتقدت اني عن نظرك بعدت
واشوت ف تراب الارض
وافتري في البعد
واتبهدل
والمجد يتبدل
بإخابود
وأشبه واحد حي
لكنه بايت ف تابوت
وافتكر انه مالهاش قومة
والرجل جات ف الخيّة
والتراب يتخلط بالمية
فاتّطين
.
.
.
واسألني: وبعدين؟
ولحد فين ؟
هاتفضل تايه؟
عارف السكة ومختار غيرها

وأرفص الخية
وأقوم من الوعكة
بطيني!
وآديني
ماشي ف سكة باب بيتك
انا مش جاي زيارة
انا طالب مغفرة وسكنى

8 Aug 2016

علمني أكتب لجوّة
واعيش كلماتك
من سكات!
واخبي جذوري
في دفا قلبي
ده الجذر لو شاف الهوا
مات!
وكلمة شايلها لبكرة
إحفظني من الشهرة!
دي ضريبتها كبيرة
إحفظني من المشي ع الحبل
إحفظني من اني اوازن
بينك وبين حاجة
ايا كانت الحاجة
إجعل حاجتي ليك
وليك وحدك.

18 Sep 2016

بدور عَ الفكرة
إللي ورا الموضوع
بدور ع الكلام إللي ما كنش في الصوت المسموع
بدور ع الجرح الجواني إللي نزف دموع
كان امتى أخر أَكَل؟
عشان تصرخ م الجوع
بدور ع السبب
وبحترم الفكرة إللي تطَلّع كٌتب
وبتشوف بكرة
وبالتّة ألوانه
متاخدة من السراسيب إللى فاضلة م أنهاردة
بدور أنهاردة عَ الفكرة
ومنها هاشوف بكرة
وبالتّة ألوانه
تعمل قصر من الكراكيب

19 Jan 2020

امام النيل رأيتها في وقت الغروب
#المياه_القادمة_من_الجنوب
تحكي قصة من كانوا
جدودي الذين صمدوا وصمتوا فنالوا
قصة لم يحكوها لكن بتاريخهم قالوا :
أن العزة لله !
وإنه لن يخزى من يتكل عليه
ولا يعود فارغا من يذهب إليه
وإن إضطهدوا وللنفس قتلوا
وقالوا لهم غدا لن تكونوا
ارحلوا او في قبوركم كونوا
يرحل غدا و ما بعده
ويبقى نسلهم !
..
#المياه_القادمة_من_الجنوب
شاهد احسان
دليل معيه
ويرحل الإنسان
وتظل الأرض مروية
بمياه قادمة من الجنوب

17 Sep 2014