أفضل طريقة عشان تتعاملوا مع بعض.. هاتعرفوها من بعض مش من حد تاني.. ببساطة كل واحد يسأل التاني عن تفضيلاته والطريقة إللي بيحب يتعامل بيها.
كل مرة بتختلفوا.. هي فرصة عشان تكتشفوا انكم شايفين نفس الموضوع من ناحيتين مختلفتين.. يعني قادرين تعرفوا أكتر عن نفس الموضوع.. فادرسوه صح.
لا بديل عن الخضوع.. أيا كان البديل.. فالخضوع هو الفعل الذي يختصر الحب والاحترام والثقة في فعل واحد.
عشتوا أيام حلوة في الخطوبة.. بس إللي جاي أحلى.. استمتعوا بكل مرحلة بدون استعجال للي جاي أو شوق للي راح..
أحلى كلام ممكن يبني حياتكم.. إنك تقول في صلاتك بصوت عالي قد إيه إنت بتحب شريكك.. صلاتك لشريكك هي أجمل كلمات الحب.. فصلوا مع بعض بصوت عالي.
مبروك النهاردة اتولد طفلكم الأول.. إسمه جوازكم.. هو شبهكم انتوا الاتنين فيه عيوبكم وفي ميزاتكم.. فا متحاولوش تخلوه شبه حد فيكم لوحده.. واقبلوه وكبروه.. لأنه هو ده أنتوا.
اقلقوا لو كلامكم مع بعض قل.. وحوارتكم بقيتوا تكملوها في سركم.. التواصل مية جوازكم فامتقطعوهاش.
لا بديل عن الاحتواء.. ولما بتحتوي.. إنت بتضم شريك حياتك جواك في ضعفه.. بتقبله زي ما هو.. بتحافظ عليه من إللي برة.. إنت مش بتاخده في حضنك عشان تغيره أو تستجوبه.. إنت بتاخده في حضنك عشان تحسسه بالقبول والآمان.
لما الموجة تعلى اتشعلقوا في ايدين بعض عشان تنزلوا نفس الشاطي.. وامسكوا في الرب قوي عشان تنزلوا على شاطئ اساسًا.
حاول تحافظ على رضاها عن نفسها.. كن لها المشجع الدائم.. كن حقيقي.. لو هي ما رضيتش عن نفسها صعب ترضى عن حاجة أو حد بما فيهم إنت.
Samuel Basta :: سطور في الحياة 