سكة نص الليل

لا السكة زهقت مني
ولا كرسي القطر قالّي كفاية
فاتحين بيبان العربيات في وشي
وبين دخولي وخروجي من الباب قصة
بتحصل ف السكة.
ولكل سفرية هدف وحكاية
….
يا قضبان بتلمع ف ليل الوادي
سامعاني!
انا نفس الطفل اللي سافر عليكي
فاكراني؟
انا كبرت.. جزئ من عمري عليكي
وانتي ما بتكبريش!
انا سافرت وغيرت مكاني
وانتي ما تحركتيش!
افضلي ف مكانك .. بحزا الوادي
ماتمشيش..
ولو باقي ف عمري أيام
هاجي اقضي شوية معاكي
وهاحكيلك عن اللي بشوفه ف الوادي.
يا سكة فاتحها بيبانها في نص الليل
الرحالّة لسة ف ترحاله
فامتقفليش!

9 Jan 2017

Tahta

23 : 39