يعيش الحب وإن مات المحبوب

عم رجب..
الراجل ده أثر فيّ وفي تشكيلي الفكري.
عم رجب هو صاحب اشهر كشك جرايد في بلدي.. وقفت عنده كتير، وصرفت مبالغ كبيرة ع الكتب عنده.. من اول ميكي لحد روايات مكتبة الاسرة.. كان تخين شوية.. نادرا ما شفته مبتسم لكن دايما شفته شغال بهمة.. صورته بتمثلي جزئ من السعادة المُصاحبة للقراية.. الراجل ده حبيته ومقدر دوره في الكتب اللي شكلت طفولتي.
انهاردة قدام كشكه سألت مراته عليه.
_ معلش انا ليّ كتير سايب البلد.. وفاكر لما كنت صغير وبجيب ميكي بجنيه ونص من عم رجب … عم رجب يعيش؟
* تعيش انت من سبع سنين مات
_ البركة فيكي يا حاجة والبقاء لله
عنيها دمعت .. دمعت وكأنه مات إمبارح.. دموع حب على إفتقاد
حب مراتك ليك يا عم رجب.. علمني درس ما قرتهوش في الكتب إللي عندك.
#يعيش_الحب وإن مات المحبوب.
#عم_رجب

8 Jan 2017