هاحكيلك سؤال

​هاحكيلك سؤال

شوية كلام 

ماينتهوش بعلامة إستفهام

بدون علامات ترقيم

بدون فواصل

بدون بداية 

بدون خاتمة 

مجرد دايرة

من كلام

تبدأ وتنتهي 

 عند كل كلمة

مهياش جُملة

لا خبرية ولا فعلية 

افعالها كلام خبر 

وخبرها محكي بأفعال

هاحكيلك حالة 

ماتتوصفش بالقوالة

ولا برسم!

حالة خوف من قلب واثق

وثقة في مشهد خوف

هاحكيلك حروف صامتة

وصمت يتنطق بحروف

حكاية سطورها فاضيه

محكية بقافيه

قافية حياة 

نهايات مواقفها واحدة 

على نفس الوزن 

قصيدة شكر 

مش بحبر 

مجرد رصة صور

في دايرة سؤال

كل صورة تبدأ بنفس المنوال

وفي الخلفية نغمة موال

واحرك بُقي وكأنه كلام بيتقال

وفي الواقع انا بكرر صمت السؤال

شوية كلام 

مابينتهوش بعلامة إستفهام 

وكل كلمة في أصلها حيرة

والحيرة والخوف عملوا جيرة

في بيوت سؤالي

دي فكرة الحكاية

ف معاك من العمر ليالي

أحكيلك فيهم السؤال؟

Samuel.G basta

28 Jan 2017

20: 12