بتاع الوشوش

يا عم يا بتاع الوشوش 

أنا ليّ عندك طلب 

أنا عايز وش خشب

وش ما بيخافش 

ما بيضحكش 

ما بيتفهمش غلط 

يا بتاع الوشوش 

تعالى احكيلك 

كلام ما تعرفوش

عن واحد مبتسم 

اتعدم!

وواحد بشوش

من الالم ما بنشفهوش

يا عم يا بتاع الوشوش 

هاتلي وش خشب

Samuel.G Basta
15 Nov 2016

01:15

إحتراق داخلي

​خلص الكلام 

فإمض بسلام

من غير سلام 

ايه تفرق قولة سلام

في حكاية إنتهت؟!

….

حكايتك انتجت

في سطوري عبر

وكل ما افتكر 

سطر فيهم

بفتكر قصص ليالي 

بيتها في السفر 

في الطل تحت القمر

وليالي سوادها زاد

خلى هواها تقل!

نيمني مخنوق

خلاني مزنوق 

بين قرارين 

متعنّونين 

واحد موت

والتاني وفاه

ويروح الصوت

ف حكايا معايا

وابدل كلماتي بالآه

وايه هاختار؟

وأخلي يومي يفوت

على امل إني ألقاه

آلاقي الفرح!

المخرج او الجواب

الاقي اي حاجة 

غير الإختيارين

وكآني بين نارين 

بستوي ببطئ

بإحتراق داخلي

بعيش بموت

بسكوت!

من غير لهب

من غير عادم

حريق وقوده 

كلام هادم

خلى طعم ملح الكلام عادم!

إمض بسلام 

انا مسامح

ماتعوليش هم جرحي

انا تعافيت

كنت ف نفق

وخلاص عديت 

وعديت

دروسي إللي بريحة البارود

ورجعلي فرحي! 

واستعديت

عشان لما معركتي تعود

اكون اتعلمت 

بعد ما إتألمت

في فهم روحي

خلاص روحي 

ولا أقولك بشياكة 

إمض بسلام.

Samuel.G Basta

3Nov 2016

22 : 00

خلّصني!

​تساعدني !

تديني جزء من وقتك و تركيزك و مجهودك … تمد إيديك نعمل حاجة سوا 

تشاركني ! 

ترضى نكون مع بعض بنعمل نفس الحاجة تاخد من إللي هاديه و تضيف عليه و تديني 

تحميني !

تدور على الخطر جاي عليّ منين و تقف في النص بينه و بيني 

أتبعني ! 

هدفك أن تمشي نفس خطوتي ورايا … أنا عارف السكة 

أسمعني !

فضي ودانك من أي صوت … خلي صوتي يملاها 

أنصحني !

كن لي مشير .. قولي أعمل إيه … أنا واثق في محبتك و حكمتك 

…….. 

كل إللي فات معاني جميله .. نداءات بسيطة بيشارك البشر بعضهم بيها … لكن فاضل كلمتين ماحدش عرف يعملهم من البشر …

….

خلصني ! 

مَن مِن البشر قادر على تخليص الآخر من خطاياه من يضمن لي السماء في نهاية حياتي 

فرحني ! 

من يملك فرحا لا يتأثر بالظروف يدوم كقوة داخلي …. 

وحده مخلصي و سبب فرحي دائما .. الرب يسوع المسيح خلصني و فرحة صار كقوة داخلي . هللويا 

Samuel George

3 Nov 2012

21: 46

الدنيا سكة

​الحياة رحلة 

والدنيا سكة

والناس ماشية 

في اتجاه بكرة 

وبتنام وتصحي 

وتفتكر وتنسى

وادينا ماشيين

في سكة اللي راحوا 

وقدام اللي جايين 

وكلهم بني آدمين 

والدنيا لسة سكة 

ناس مشيت فرادّي 

وناس مشيت ف قطيع 

والكل بيضيع 

الكل ف السكة ماشي 

واهو ماشي 

عشان اي شئ

وبأي شئ

اهو شئ 

اسمه ماشي

..

في سكة دنيتي 

اخترت صحبتي 

اصاحب اللي عارف السكة 

واللي شايف 

وعشان ماكونش خايف 

من ضلمة الطريق 

وحفر المدقات 

واخطار البيات 

مشيت ف صحبة 

طلبت صداقة 

قلتله عايز نكون ف علاقة 

تاخدني صديق ؟

..

خلقتني اول طريقي 

وعايز تكون صديقي 

وتكمل سكتي 

وتونّس وحدتي

ما احلاها صحبة 

يا بختي بيك 

#نوفمبر_الصحبة

3Nov 2015 

23: 01