نقطة نور

​ولكل نفق نقطة نور ف آخره.

بتكبر كل ما تروح ناحيتها

ولكل نفق قصة وخريطة 

ولكل نفق سكة وطريقة

اياك تتكعبل ف ضلمته

وإن وقعت قوم!

المهم تخرج من النفق 

مش مهم نضافة الهدوم 

لا الميتين بشياكتهم هايقوموا

ولا العايشين بعفارتهم هايتلاموا

واصبر مراقب دايرة نورك 

وكل ما تكبر نهاية نفقك بتقرب

وايا كان نفقك

افتكر انك في الدنيا متغرب 

والدنيا نفقنا الكبير 

ايماننا فيه بيتجرب 

ويا بخت اللي يوصل 

واللي يعافر 

وف وقعته مش بيكابر

ويا بخت اللي مشعلق عنيه 

على نقطة النور 

بكرة حلمه هايكون ف إيديه

Samuel.G Basta

18 Oct 2916

00: 12