الافكار المميزة

كنت اعتقد ان تلك الكتابات المميزة تأتي لهؤلاء عندما يمسكون قلما رشيقا ليكتبوا في صفحات جميله فوق ذلك المكتب المريح.

لكني إكتشفت ان الافكار تأتي كالمخاض فجأة … تولد حيث انت … ان لها القدرة على السكن فوق اي سطح إلى ان تُكبّرها انت فوق اوراقك الجميلة.

إن الافكار المميزة تنتج من هؤلاء الذين قرروا ان يعيشوا انفسهم بصدق … لان الله خلقنا مميزين … تأتي لهؤلاء الذين يصغون بإحترام لأصغر صوت داخلهم … لهؤلاء الذين ان ينتبهوا بإهتمام لاصغر حركة تحدث … للذين يؤمنون بغرض وجودهم في تلك الدنيا في هذا الزمان.

كونوا انفسكم واسعوا لأجل الغرض.

حسب الإتفاق

​انا جاي بعد الإتفاق!

يوم ما اتفقت بيني وبين نفسي

وشهدت انا على نفسي 

انا فاكر اني قلت كلام كتير

مش فاكر منه غير الحماسة 

وثقتي في اني هاقدر 

انا خلاص بقيت اكبر 

ايه يعني تمسك إيدي!

ما انا باعرف اعدي لوحدي

انا فاكر الإتفاق 

اني هاكون كويس  

وانا هاتغير 

وهاعمل وكمان هاعمل 

انا فاكر كويس 

اني مكملتش يوم 

وقبل ما يجي وقت النوم 

كنت نسيت الاتفاق 

مع اني فاكره كويس

انا جاي ألغي الإتفاق؟

انا مش كويس 

امسك ايدي وعديني 

طبطب عليّ وهديني

انا طلعت عيني

لما اتفقت مع نفسي 

وكأني الشاطر إللي هاعملها 

هاقول كلمة وانفذها 

كنت باصص عليّ 

رسمتني قوي 

وانا من غيرك ضعيف 

كنت فاكر ان النجاح بإيدي 

حتى ولو كان طفيف

انا جاي اعمل اتفاق

جديد

انا مش فيه 

انا هاسمع واصدق 

وف يدّك هاتشعلق

وهامشي سكتك 

بقوتك 

وهابطل اصدقني 

وهابطل اوعدني 

أصلي دايما 

بخلف الإتفاق.

….

انا جاي انفذ الإتفاق

سايب نفسي 

وجايلك لوحدي 

وكل منايا 

تعمل جوايا 

احتياج إليك 

فافضل في رقبتك متشعلق 

واعيش وانا عيني عليك 

ماسك ف ايديك 

ومصدق ان ضمان الاتفاق 

هو انت

انت إللي وعدت 

مش انا 

وانت إللي هاتشهد 

مش انا 

كل إللي عليّ

اني اجيلك

وانا جايلك حسب الإتفاق

Samuel.G Basta

23:23

15 Sep 2016

​واسألني: مالك؟

وافكر ارد عليّ بكلام متزوّق

وافتكر اني عارف الإجابة 

وعارف اصل البيت 

زحمة ولا متروّق

وأصارحني … واصدمني 

واقنع نفسي

انه من نفسي وبنفسي 

مش هاوصل لحاجة!

لازملي زقة سماوي 

ترتيب من جوة لبرة 

فافضل ازن على روحي 

وأسألني:

على إيه ناوي؟

Samuel.G Basta

00:25

15 Sep 2016

سكة بيتك

​دلني على سكة بيتك

انا عارف ان بابك مفتوح

واسمحلي أبات الليلة في كنفك

وانام وانا ف حضنك

سمعني كلام بسلطان يهدّي نبضي

واسمحلي كمان …

امسح دمع عيني في طرف توبك

انا عارف غلاوتي عندك

عشان كدة … اسمحلي في أخر طلبة

اسمحلي أعزل عندك ….

هاجيب افكاري واحلامي وصور الماضي

هاجيب كل حاجتي ف بيتك .. واعتبرها بتاعتك

وارمي اللي مالوش لازمة … مافهاش غالي عليك 

واسمحلي … اسمحلي اصحي على نورك

يا واخد بالك من … كتّر خيرك

بحبك يا رب يا قوتي.

Samuel.G Basta

14 Sep 2015

00:36