عًّرٍف نفسك؟
أنا إللي باحاول أعرفني .. وبحاول أروضني
أنا لما شفتني أول مرة في المراية إتخضيت
أنا إللي بحب نفسي أكتر من الناس
وبضر نفسي أكتر ما بيضرني الناس
أنا التايه في كونه الداخلي.
أنا مين؟
أنا سؤال ماعرفلوش إجابة
هو أنا واقع و لا مجرد حالة
أنا إللي تهت عن مصدري
أنا حجر هربت من محجري
أنا إللي كنت فاكر نفسي عارفني ..
كنت عامل نفسي “إني بهتم بيَّ”
أنا إللي بعدت عن الخالق
بمزاجي سرَحت
و لما نويت أرجع سألتني عن السكة .. فتهت
أنا مين ؟
أنا صفر مطلق
نقطة في قصة كون
راس في سلسال بشرية
أنا ولا حاجة بعيد عنك
أنا إللي نويت أعرَّف نفسي بيك
ربطت وجودي بوجودك في حياتي
مملكتي الزحمة .. تعال أسكنها
مش زائر
تعال ملك .. و أنا عرش.
أنا إللي عرفت نفسي لما سألتك عنها
أنا إللي لما دورت عليّ لقيتني عندك.
Samuel.G
10 Sep 2014
22:30
Samuel Basta :: سطور في الحياة 