عايز تسمع شعر مني ؟

عايز تسمع شعر مني ؟

أناجيك ربي و تكلمني

أنا التراب إللي بنفختك صرت

أنا بقوة روحك سرت

عايز تسمع شعر مني ؟!

…..

يفرق معاك كلامي

حتى و لو كان على قد علامي

يا عالم بأسرار الكون

مين أنا أكون ؟

عشان تسمع شعر مني ؟!

….

كتبت لمصر و الحياه

عالنيل إتغزلت في المياه

كتبت شعر للميت و الحي

للصحاب و للرايح و إللي جاي

لسه عايز تسمع شعر مني ؟

…

بتحب شعري

و خطي إللي مش مقري

و حروفي المكسرة

و أفعالي المتنتورة

…

يا خالق في الكون مزيكا

شعري جنب خليقتك روبابيكا

لسه عايز تسمع شعر مني ؟

…..

باحبك

دي قصيدة في كلمة

بيوت شعر ساكنه ديوان

و العنوان ؟؟

باحبك

…

عايز تسمع شعر مني

ما عنديش غير “باحبك “

بكل الحروف و الكلمات

و المعاني و الآهات

باحبك

…

باحبك يا رب يا قوتي

أبارك أسمك و سط أخوتي

..

أحبك يا من في مسألة حايتي

لاتوجد عندك معطيات جديدة

فالكل أمامك مكشوف ظاهر

و أنا معروف عندك قبل بداياتي

….

أحبك يا رب يا ملجأ

يا من نفسي من عندك تبدأ

و في حضنك روحي تهدأ

..

أحبك يا رب يا نوري

أحبك يا رب يا صخرتي

أحبك يا رب يا مخلصي

أحبك ربي يسوع

..

عايز تسمع شعر مني !

تَدور الكلمات و المعاني

و تختلف ألحان الأغاني

و أعيد الكلام من تاني

باحبك

..

عايز تسمع شعر مني ؟

ما عنديش غير كلمة ” باحبك “

Samuel George

Shoubra

21 Sep 2013 – 11: 30