لبكره!

بكره..

ياما حلمتلّك

وقبل ما انام قلتلّك

بكره هاعمل فيك

إللي ماعرفتش اعمله انهاردة

وإللي فاضل عليّ من إمبارح

ومن إللي قبله

اصله كتير إللي كتبت عليه

“لبكره”

اصل انهاردة خلص

ولو فاضل فيه حبة

الصراحة !

انا إللي خلصت

نفسي ف راحة

مش بس للمكنة إللي داير بيها

لروحي كمان

ونفسي نفسها تصفى من زمان

وألاقي للبراح جوايا مكان.

وانام وانا متطمن

إن بكره مالوش غير شغله

مافيش عليه واجب بايت

وكلها أحلام

مابتتحققش

وإسأل إللي عاشوا سنين

عمر ما الحلم بيخلص قبل البني آدمين

كلنا احلامنا اكبر مننا

وان حقننا حلمنا الكبير

في حبة احلام صغيرة بيكونوا منسيين

وآهو بكره جاي

عشان اكمل كلامي عنه

بكره

5 May 2016

23 : 54