احتكاك مباشر مع صخر الحياة

عارف شعورك لما ترجع من امتحان وتتفرج على مكتبك … وتلاقي ورق ومذكرات وشخابيطك ومسوداتك واقلامك إللي متنتورة … عارف لما تذاكر ساعات وأيام عشان خاطر ساعتين … فاكر لما كنت بتقرا مراجع وكمية ورق مالهاش اول ولا آخر عشان تدخل تكتبلك عشر صفحات إجابة …
افتكر كل ده وانت بتعيش كل يوم … عشان كل يوم هو مذكرة جديدة وكل موقف هو صفحة فيها … اتعلم ف حياتك ومن حياتك على قد ما تقدر … عيش وانت بتتعلم … عشان كل خبراتك ودروسك هايجيلك وقت وهاتحتاجها كلها ف ساعة زمن … في موقف من إللي بيسموهم “احتكاك مباشر مع صخر الحياة” …  وقتها كل حاجة اتزرعت جواك هاتبان … كل حاجة طورتها ف نفسك هاتنفعك.
اتعلم في دنيتك مرتين … مرة من خبراتك ومرة من خبرات إللي حواليك … وما تدورش على امتحانك … اطمن هو عارف سكته ليك.
دمتم متعلمين من حياتكم
#حياتنا_صلصال_بيتشكل
#هناك_هدف_من_وجوك
#ابريل_الجذور
24 April 2016
22:55

Samuel.G Basta

Advertisements

الخروج الآمن

كان بابا بيحاول يفهمني درس مهم … بس شرحهولي بطريقة مانستهاش لغاية دلوقتي.
+ تفتكر يا صمويل ايه اول حاجة بيعملها الحرامي لما يدخل شقة عشان يسرقها؟
_ يدور ع الدهب والحاجات الغاليه
+ بس مش دي اول حاجة
_ امال ايه اول حاجة يا بابا؟
+ اول حاجة بيعملها انه بيأمن لنفسه مخرج سهل عشان يهرب لو اتكشف
…..
ده نفس الكلام اللي اتعلمته في تدريب الإخلاء ومكافحة الحريق … خلي باب مفتوح ف ضهرك عشان تهرب منه وقت الخطر.
….
كل الدروس دي بتتكلم عن #المخرج_الآمن …. عيش كدة ف حياتك … كافح عيش اتعلم ادرس سافر صاحب … بس ف كل ده إدرك انه ممكن تتعرض لخطر … مش لازم على حياتك … ممكن يكون على سلامك الداخلي او استقرارك … ف اللحظة دي لازم تخرج #خروج_آمن.
….
مش شطارة انك تكمل في قلب الحريق … واجه الناس بفشلك في انك تطفيها افضل ما تواجهم بجثتك المحروقة ويتهموك بالغباء وقتها.
مش شجاعة انك تواجه حاجة انت مش قدها … ده كبرياء .. اعرف حجمك وقدرتك وواجه او انسحب.
….
لما تدور على #جذور المشكلة لضياع ناس حواليك … هاتكتشف انهم ماخرجوش خروج آمن إما لأنهم ماقدّروش حجم الخطر او لأنهم نسيوا يعملوا مخرج آمن.
#ابريل_الجذور
23 April 2016
1:30

Samuel.G Basta

من حقي!

من حقي اسأل ..
بس انا واثق ف صلاحك
من حقي اتضايق …
بس ما اتذمرش
من حقي استعجل
بس هاستنى وقتك
من حقي استعجب
بس هاصدق المنطق بتاعك
من حق احتياجي يصرخ من #جذوره
بس هاسكّته لأن شبعك احلى
من حقي اكون انسان
بس مش هاستسلم لضعفي
من حقي اتنازل عن حقي
بنفس راضية .
#اسئلة_جذرية
#ابريل_الجذور
6 April 2016
19:30

Samuel.G Basta

التبديل

بيقولوا
لكل دوا بديل
وقبل النهار كان ليل
ومسموح ف 14 يوم بالتبديل
بيقولوا
هات وخد
او ادفع فلوس لو بتعرف تعد
ولكل شئ تمن حتى ولو كان ع القد
بيقولوا
المقايضة اول نظام تجارة
يومها كيلة الدقيق بعصاية سنارة
وإضحك عليك لو بدلت تفاح بحجارة
لكن هو قال
الحسبة مختلفة عن حساباتكم
فالجمال هاديه مقابل رمادكم
والنوح والدموع هابدلهم بافراحكم
وبدل الروح اليأسة هايتسمع تسبيحكم
حساباتي مختلفة
هات رمادك
كفف دموعك
واطلق روحك اليأسة
فالتبديل مازال متاح في قائمة السموات
#ابريل_التبديل
6 April 2015
20:22

Samuel.G Basta