ما حصلش حاجة

انا يوم ما اتولدت
ما حصلش حاجة
طفل عادي اتولد
زود العدد
بتاع عيال البلد
واهو اسم ليه شهادة
وعملوله سبوع كالعادة
واتمنوله ووصوه
وجابوا يد الهون ودقوه
وازعجوا منامه
ف بداية ايامه
وعملوا اللي فاكرينه
من عمايل اهاليهم فيهم
عشان ما يطلعش مختلف عنهم
ولو مطلعش زييهم
مايهمش !
اهو هايعيش ويمشي
في سكة اللي ماشيين
دي فكرة الحياة
انه في ارض وفي بني ادمين
وبيجروا ورا بعض
واللي تحفره م الارض
بيزود كوم التراب ف وشك
ولازم تشقى عشان تبني عشك
وتاخد بالك من اخوك لحسن يغشك
وماشيه حبة بالدراع
وبين الشعوب بالصراع
والحرب ع الميه
وع التراب
ويموتوا بعد ما يتصورا مع السراب

سيبوه يعيش صراع اللي قبله
ف سكة الحياه
سيبوه يواجه الصعاب اللي هاتقابله
في كل اتجاه
سيبوه يكون بني آدم
ووصوه وانصحوه
وف الأخر سيبوه
يصارع م اللفة للتابوت
عاش ف كوخ او اتوج لعرش
ف الاخر هانحكي قصته بعد النعش
ماحدش بيعيش مكان غيره . ما بينفعش!
اهو طفل اتولد وف قصته سطرين
اسم البلد والوالدين
وصرخة افتتح بيها كلامه
علّم بيها اول ايامه
سيبوه …

واجهت ايامي
وجريت ورا احلامي
من اول الشيكولاته
والديك اللعبة اللي بيزمر
وكبرت حبة وبقبت اتذمر
ع الاكل الصحي
يا امي سيبيني براحتي!
وعلموني ان الألم
ضريبة النمو والتغيير
وان نقل الكلمة ف الواجب
ماهواش ألم العقوبة
ده عشان ابني ف حياتي طوبه
وفهموني مصدري ومصيري
واني هنا مش من نفسي
وان الرب اللي بيحبني خلقني
وادوني مفاتيح الحياه
قبل مفتاح البيت
واهتموا باني ابني الحيط
اللي مفروض اسيبه ف بيت الدنيا
وسابوني اعيش
وقالولي ان الزمن واحد
واليوم ثابت
وفرصتك فيه يا صابت يا خابت
بس انت حاول
ومش لازم تعمل المتداول
خليك مختلف
وان افتكروك مجنون
افتكر ان الجنان
بيصنع المختلف

واديني عايش
بدور عليه
الهدف اللي جيت إليه
لاجل ما كمل القصة والحيط
لاجل ما أسيب ف الدنيا بيت
مش بحجارة
اسيب فكرة تعمل منارة
للي بعدي

انا يوم ما اتولدت
ما حصلش حاجة
ومن ساعة ما اتولدت
باسعى لاجل الحاجة
اللي بيها اكون
عملت دوري ف تاريخ الكون
23 Jan 2016
11:35

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s