التايهين

غنّوا لليل غناويهم
وحكوا للنجوم حكاويهم
وسهروا لحد الفجر
وناموا والسما فيها البدر
خايفين من نور الشمس
يسيّح احلام الامس
صاحبوا حاضرهم
وحكوله عن ماضيهم
شاركوه تعبهم وآلامهم
بكوا في حضن لحظاته
على قصة حلم ومماته
ونسيوا ان حاضرهم
بكرة هايسكن في ماضيهم
ورسموا بكرة بدموع انهاردة
رسموا صورة بلون الدموع
مالهاش ملامح
وبتوقيع غير واضح
كتبوا اللي فاكرينه من اساميهم
…
يا تايهين في متاهة الارض
ماهياش بتلف بيكم
انتوا بس إللي دايخيين
فوقوا من سكر حزنكم
عيشوا انهاردة لأجلكم
بصوا لسماكم مش لقبركم
احكوا ماضيكم بضحككم
مهياش بقوتكم ولا بحكمتكم
فوقوا ….
ضحكتكم مش من عندكم
فرحتكم هاتيجي لما ترموا همكم
على خالق الكون
فوقوا ….
30 sep 2015