مطووش

مطووش
اول مرة سمعتها سألت :يعني إيه؟
قالولي : يعني تايه ومافيش حاجة بتفضل في إيديه
بيجري ولا يحصل
وبيسافر ولا بيوصل
التوهان جواه متأصل وفقدان الهدف الثابت، باين في عنيه
…
مطووش
ف سكون الليل مدووش
وف النهار م الزحمة ماتشفهوش
مشغول من فضلك ماتكلمهوش
من الإرهاق ما تعرفهوش
….
مطووش
وفاكرنفسي شغال
شايل عن الناس أحمال
وبطل ف عنين نفسي استاهل التكريم
والشباب في سكتي لازم تمشي
اصلي فاكر نفسي فعال
واستحق اكون قدوة اجيال
…
مطووش
وزهقت من الزحمة
والجري طول النهار عشان اكلة لحمة
واخر الليل اتعشى فول
زهقت من اني أقابلني صدفة
في طرقة ضلمة
زهقت من لوم نفسي
من قولة أنا المسؤول
…..
مطووش
عايش وجوايا واحد ما عرفوش
برسم عنه صورة ماتشبهوش
فاكر ان المظهر بالشكل المرسوم
لكن ايه لزمة الدهان لبيت مهدوم؟!
…
مطووش
والسبب واضح
ويا نفسي لازم اصارح
انا مش راسي على شط الراحة
سايب مركبي سارح
منين ما توديه الموجة رايح
….
مطووش
لاني مش قاعد قدامك
مش شبعان بكلامك
يا رب انا هنا ف الأرض بسببك
وما ينفعش اعيش من غير سندك
….
مطووش
وباعلن من ساحة المشغولية الانسحاب
إيه لزمة ان تراب ينتج طول حياته مجرد تراب!
انسحاب من خلف كل غاية طلعت سراب
ليه اسيب العمار عشان عيشة ف خراب؟!
…
مطووش
وهامشي سكة اخيرة
سكة بيتك
على باب الله وقفت
فدخلت إلى الحضرة
وصرخت باكيا اشبعني بشخصك
ولتربط مركبي بشطك
وإرحمني يارب
فأنا هو المطووش
Samuel G. Basta
26 march 2015

Samuel.G