سلامات

سلامات ..

لكل إللي أتولد و مات

عدى علينا مرور الكرام

عمره ما عطى و لسانه حاله :”هات”

أخد من الدنيا على قد ما يقدر فرحة و أهات

و سابها و نسينا و نسيناه مع إللي فات

إللي فات مات

و التعلب ما لفش على الأناني بالذات

ليه يتعب نفسه مع حد كده كده مات !

مات بالحيا يوم معاش لنفسه

نسي ناسه نسي نفسه

و إفتكر إنه بإللي معاه هايكون

و إيه هاتبقى لو ملكت الكون ؟

إيه ! ملك ، سلطان ، إمبراطور !

أكيد ليك مكان في الطابور

و لما يجي عليك الدور

ها تبقى من سكان القبور !

هنيالك .. و سلامات

أروح أدور على إللي في سبيل غيرة مات

و عطى إللي محتاج و إللي إتكسف يقول هات

أروح أخدم غيرى

ما هو إللي بيحب

بيخدم من القلب … من غير ذات

سلامات !

هامشي ورا سيدي … متابع الخطوات

Samuel G.Basta

 

 8, Nov 2012